26. Aug. 2020

Lítið at fáa av toski á Landgrunninum

 

Magnus Heinason er júst liðugur við árligu yvirlitstrolingarnar á føroyska landgrunninum, har 200 hál á ein tíma verða tikin. Sambært stovnsmetingunum vóru nøgdirnar av toski søguliga lítlar í tíðarskeiðnum frá 2004 til 2017.

 

Í 2018 var toskurin komin fyri seg aftur, men nýggjastu yvirlitstrolingarnar benda á, at tað í 2020 aftur er sera lítið til av toski á føroyska landgrunninum. Tað tykist vera nakað av toski nær landi, har rannsóknarskipið ikki fær roynt, og tí kann veruliga nøgdin av toski vera nakað størri enn yvirlitstrolingarnar vísa. Bæði toskur og tann størra hýsan vóru sera illa í holdum. Hetta sást aftur í magakanningunum, har nærum einki varð etið av nebbasild.

 

Eisini var minni etið av hvítingsbróðri og krabbadýrum á botni. Úti á djúpum var tó nógv til av smáum svartkjafti og har var toskurin væl fyri. Tað var framvegis nakað at fáa av hýsu hóast tað var minni enn í fjør. Nógv var at fáa av hvítingi, gulllaksi og blálongu.

 

Les túrfrágreiðing her.

 

 

Petur Steingrund