Vís undanfarnu úrslit
Seilur
Gonostoma elongatum
Seilur hevur høgan og smalan kropp, sum breitt knívsblað. Hann hevur lítið høvd, smá eygu frammarlaga á gronini og stóran kjaft. Ovara kjaftbein gongur heilt aftur til kápuna. Hann hevur hvassar tenn, um enn ikki so langar. Hann hevur eina ryggfjøður, fremri endi er umleið mitt á bakinum, eina lítla fitifjøður mitt millum ryggfjøður og stert, smáar uggafjaðrar og smáar búkfjaðrar tætt aftur móti tí longu gotfjøðurini. Gotfjøðurin byrjar heldur fremri enn ryggfjøðurin og kemur næstan aftur til tann nógv sýlda stertin. Stór ljósgøgn eru niðast á síðunum og um sporlið, 2 ljósgøgn niðast á klingruni, dupult rað framman fyri gotfjøðurina.
Útbreiðsla
Seilur er norður ímóti Íslandi og Føroyum. Í flógvum sjógvi í øllum heimshøvunum uttan Miðjarðarhavinum. Undir Føroyum er hann fingin í botntroli 35 fjórðingar í útnyrðing úr Mykinesi og í flótitroli suður av Munkagrunninum.
Stødd
Seilur verður í minsta lagi 27 cm.
Dýpi
Hann er úr 50 niður á 400 m um náttina, niður á 1200 m ella enn djúpari um dagin.
Litur
Hann er dimmur, myrkt brúnur, svartur. Síðurnar eitt sindur silvurblankar. Fjaðrarnar eru smáprikkutar.
Eyðkenni
Smali kroppurin, liturin, lítla høvdið, langa gotfjøðurin og ljósgøgnini niðast á síðunum.
Týdningur
Seilur hevur ikki vinnuligan týdning.
Nøvn á fiski á øðrum máli
| Før: | Seilur |
| Lat: | Gonostoma elongatum |
| Eng: | Elongated bristlemouth fish, Long-tooth anglemouth |
| Fra: | Gonostome a grandes dents |
| Ísl: | Kjálkastirnir |
| Jap: | Ô-yoko-eso |
| Rus: | Gonostoma |
| USA: | Elongate fangjaw, Longtooth anglemouth |
Vit viðmæla
Viðkomandi tíðindi
Jákup Sverri liðugur við sildakanningar
Leygarkvøldið 4. mai kom Jákup Sverri aftur av árligu silda- og svartkjaftakanningunum norðanfyri. Í kanningarøkinum hjá Jákupi Sverra var lutfalsliga lítið at síggja av sild. Norðhavssild var at síggja í…
Svartkjaftakanningar sunnanfyri
Ekkókanningar av svartkjafti sunnan fyri Føroyar og suður í bretskan og írskan sjógv vóru gjørdar í tíðarskeiðinum 20. mars til 5. apríl 2024. Ekkóvirðir (nøgd) av svartkjafti, Jákup Sverri 20/3-5/4…
Framvegis nógv av toski á Føroyabanka, sum tó er rak í mun til onnur ár
Árligu vár-yvirlitstrolingarnar á Føroyabanka vóru gjørdar tann 13.-17. mars 2024 við rannsóknarskipinum “Jákup Sverra”. Einans 13 trolstøðir av 29 vórðu kannaðar í ár, av tí at Jákup Sverri fekk tekniskar…
Eitt vet meira av toski á føroyska landgrunninum
Rannsóknarskipið “Jákup Sverri” hevur gjørt ta árligu váryvirlitstrolingina á føroyska landgrunninum, har 100 hál á ein tíma vóru tikin. Tað var framvegis sera lítið at fáa av toski, men kortini…
