Bróskfiskar

Havmýsnar skilja seg frá øðrum bróskfiskum m.a. við at hava eitt kápuskapilsi uttan á táknunum. Havmýsnar eru bulmiklar og hava ikki stert. Tær hava tvær ryggfjaðrar. Stóran pík við fremru ryggfjøðurina. Tær hava ikki roðslu. Kallfiskarnir hava ein flytiligan og krókskapaðan útvøkstur í enninum.

Havmýsnar liva um øll høv, niður á stór dýpi.

Í hesum hópinum eru 3 ættir við 6 slektum og 33 sløgum.

Av teimum eru við Føroyar 2 ættir við 4 slektum og 5 sløgum:

Nasahavmúsaættin (Rhinochimaeridae): Nevhavmús og tranthavmús

Havmúsaættin (Chimaeridae): Havmús, smáoygda havmús og fjaðurfagra havmús

Hetta eru stórir hávar, við tveimum píkaleysum ryggfjaðrum og einari gotfjøður. Teir hava fimm táknarivur, hava ikki eygnalok, og teir hava stóran kjaft, ið røkkur aftur um eyguni. Teir flestu hava andahol.

Teir eru bæði nær landi og langt til havs.

Makrelhávarnir er ein heldur lítil, men rættuliga fjølbroyttur hópur av hávum við 7 ættum, 10 slektum og 15 sløgum.

Við Føroyar eru 3 ættir, við einum slagi í part:

Revahávaættin (Alopiidae)

Brugduættin (Cetorhinidae)

Hemaraættin (Lamnidae)

Hesin er tann talríkasti av hávahópunum.

Eygnalokshávarnir hava fimm táknaop, har tey aftastu eru oman fyri uggafjaðrarnar. Eina gotfjøður, tvær píkaleysar ryggfjaðrar. Teir hava eygnalok (blinkhinnu), summir bert lutvíst. Kjafturin røkkur aftur um eyguni. Nakrir hava andahol.

Teir liva bæði á djúpum vatni og á grunnum og eru bæði við botnin og uppi í sjónum.

Hesin hópurin hevur 8 ættir við um 49 slektum og 224 sløgum.

Av teimum eru undir Føroyum 4 ættir, við 6 slektum og 7 sløgum:

Reyðhávaættin (Scyliorhinidae): Íslandshávur, ringhávur, jensenshávur og smáblettuti reyðhávur

Kambhávaættin (Pseudotriakidae): Kambhávur

Slætthávaættin (Triakidae): Gráhávur

Bláhávaættin (Carcharinidae): Bláhávur

Hesir eru teir mest primitivu hávarnir.

Teir hava eina píkaleysa ryggfjøður og eina gotfjøður. Báðar hesar fjaðrarnar eru aftarlaga á sporlinum. Teir hava ikki eygnalok. Táknarivurnar eru 6, tó okkurt slag av Hexanchidae hevur 7, við Føroyar tó bert við 6 táknarivum.

Teir eru í øllum teimum stóru høvunum, mest á djúpum vatni.

Í hesum hópinum eru 2 ættir við 4 slektum og 5 sløgum.

Undir Føroyum eru báðar ættirnar, við eini slekt og einum slagi í part:

Állahávaættin (Clamydoselachidae)

Sekstáknahávaættin (Hexanchidae)

Skrubbhávarnir hava andahol og 5 táknarivur. Teir hava tvær ryggfjaðrar, summi sløg við píkum frammanfyri, onnur uttan. Teir hava ikki gotfjøður, og eingir kjalir eru á klingruni.

Teir liva um øll høv, bæði djúpt og grunt.

Hesin hópurin hevur 6 ættir, 24 slektir og 97 sløg.

Fiskar úr øllum 6 ættunum eru at fáa undir Føroyum, og tær hava her 10 slektir og 12 sløg:

Hávaættin (Squalidae): Hávur

Skrubbhávaættin (Centrophoridae): Skrubbhávur og nevhávur

Ljóshávaættin (Etmopteridae): Svarthávur, búksvarti hávur og døkkhávur

Hornhávaættin (Oxynotidae): Hornhávur

Brandhávaættin (Dalatidae): Høvuðlítli hávur

Skøturnar eru eyðkendar við sínum flata kropsskapi, spísku gron og langa hala, oftast við nógvum píkum eftir baki og hala. Kjafturin og táknaopini eru á blindusíðu, meðan eyguni og andaholini eru á eygnasíðuni.

Undir Føroyum eru skøturnar bert í sjónum, men aðrastaðir eru nøkur sløg bæði í feskum vatni og í blandingsvatni.

Halin á skøtu er í veruleikanum aftari partur av rygginum. Hann verður tó nevndur hali millum manna, og eisini her. Ryggfjaðrarnar eru aftarlaga á halanum, og sterturin bara hómast aftast. Ravarnir eru í veruleikanum uggafjaðrarnar, sum við tíðini hava fingið tað skapið, teir hava nú.

Eins og aðrir bróskfiskar, hava kallfiskarnir tvey útvortis makingargøgn hangandi aftur úr sær, eitt hvørjumegin halarótina.

4 ættir eru í hópinum, 32 slektir og 285 sløg.

Við Føroyar er bert tann eina ættin, og hon hevur 8 slektir og 14 sløg:

Skøtuættin (Rajidae)