Um Havstovuna

 

Havstovan hevur til endamáls at gera kanningar av føroyskum havumhvørvi og tí livandi tilfeingi, har er, og at ráðgeva og kunna landsins myndugleikum og almenningi um hesi viðurskifti.

 

Á hvørjum ári skal hon lata Føroya Landsstýri upplýsingar viðvíkjandi støðuni í fiskastovnunum á føroysku landleiðunum og á sjóleiðum uttan fyri føroysku landleiðirnar, sum føroysk fiskifør gagnnýta, og skal gera vísindaligar tilráðingar og metingar samsvarandi endamálinum í lógini um sjófeingi. Fyri at røkka hesum setningi ger Havstovan á hvørjum ári fiskirannsóknir við egnum og leigaðum skipum, og harumframt kanningar av veiðuni hjá fiskiskipum.

 

Regluligar kanningar av havumhvørvinum verða gjørdar á hvørjum ári. Tær skulu lýsa broytingarnar frá einum ári til annað og hjálpa okkum at skilja broytingarnar í livandi tilfeinginum. Kanningar eru ein treyt fyri at meta um møguleikarnar fyri burðardyggari gagnnýtslu.

 

Havstovan stendur eisini á hvørjum ári fyri fleiri verkætlanum innan "fiskivinnuroyndir". Hon tekur lut í norrønum og altjóða verkætlanum innan fiski- og havfrøði av ymsum slag.

 

Javnstøðuætlan 2023- 2027

Javnstøðuætlanin hjá Havstovuni leggur fram høvuðstættir, mál og átøk til frama fyri javnstøðu millum kynini.

 

Endamálið við ætlanini er at fáa javna luttøku av kvinnum og monnum í mun til arbeiðslívið á Havstovuni. Hetta inniber átøk til frama fyri javna umboðan av kvinnum og monnum, átøk ímóti vansum vegna kyn, javnbjóðis treytir í mun til starvsmøguleikar og átøk fyri at skapa samljóð millum familju- og arbeiðslív hjá starvsfólkunum á Havstovuni. Úrslitini frá dátuinnsavningini, málini og átøkini skulu vera liður í áhaldandi arbeiðinum hjá Havstovuni at skapa javnstøðu og margfeldi á okkara stovni.

 

Ensk útgáva av javnstøðuætlanini kann síggjast her